بتضحك ليه ؟

بتضحك ليه ؟
سألني سؤال
وحيرني ف ردي عليه


سألني "رغم أحزانك بتضحك ليه؟"
سؤالك صعب يا ابن الإيه
تصدق ...
عمري ما سألته لنفسي ف يوم
ولا فكرت يوم في جواب
أقولك إيه ؟
أقول فرحان ؟
ما حِبشْ إني أكون كداب
مانا واحد من الملايين
حزين .. لكن ف قلبي حنين
للحظة فرح تملاني
تفكرني بإني شباب
مابكرهشي سواد الليل
وحالف إني مالبسهوش
وأحوش الدمع لما يسيل
ومهما يزيد عليَّ الكيل
على وشي أمل منقوش
ولسه اليأس ماعرفتوش بحمد الله
ورغم القهر والمعاناه
بعوم وأحلم ببر نجاه
ولما الصبح نور الشمس يتقسم
بقول الله وأقوم أرسم
ملامح وش طفل بشوش
قابلته زمان ... وكان ياما كان
ورغم الحزن مانستهوش